(Asteburu betearen kronika laburra)
Bariku eguerdian manifestazinoa egin eben Negarra-ko langileek eta hainbat herritarrek. Urkuzuko lantegiak daukazan 170 langileetatik 59 kaleratu bota gura dabez eta greba mugagabean dagoz beharginak apirilaren 16tik hona. Lantegiak ordezkaritza daukien CCOO eta LABeko banderakaz zeharkatu ebezan herriko kaleak. Bildu-ko ordezkariek be (Beiñat Anzola alkateak barru) hartu eben parte protestan. Gogoratu behar da Negarra-ren kasuan, Rajoyren azkenengo lan-erreformak kaleratzeak erraztu eta merketzeko emondako aukera erabili dauela enpresak.
Iluntzean izan zan Begitu-ren 10. urteurrenaren txanda. (Bide batez, zorionak blog hau egiten dogunon partez Begitu posible egin dozuen eta egiten dozuen guztioi). Maider Yabar ikusi genduan ia beteta egoan Kultur Etxeko areto nagusian, oihaletan gora eta behera, grabitatearen kontra burrukan, bertaratutakoen txalo artean. Bihotz Gorospe aurkezleak Igor Estankonari emon eutson txanda. Begitu-ko sorrerako kontuak harilkatu ebazan arteaztarrak, inork holango ekitaldi batean inoz bota ez dauzanak kontatuta. Musikak be eukin eban bere lekua ekitaldian. Eneritz eta Marina entzun genduzan kantuan, “a capella”, lehen egiten eben moduan, Arratiako herrien inguruko aspaldiko koplakaz. Juanma Labandibar-ek sano kantu hunkigarria eskaini eban, teklatuaren laguntasunagaz. Urtzi Barrenetxea eta Cristina Ruizek aurkeztu eben Begitu-ko webgune barria, aurrekoa baino dinamikoagoa eta argazki eta bideoak bidaltzeko aukera eukingo dauena. Oihane Barrenetxeak, Begitu argitaratzen dauan Zertu Kultur Elkarteko lehendakariak be hartu eban berbea, bide honetan egitasmoa lagundu daben guztiak eskertuz, batez be, proiektua diruz lagunduten daben norbanakoak, begitu-lagunak (euren izenak pantaillan proiektatuta ikusten genduzan bitartean). Eta amaieran, sorpresa, Arratiako musikariak (Nik Khaos, MG, Esti eta Olatz, Larregi, Eskean… fijo baten bat ahaztuko dogula), eskola eta estilo desbardinetako gazteak, neska zein mutilak, danak taldean, egunerako bereziki prestatutako kanta jo eban. Ostean, edaria eta pintxoak, tertuliarako lagungarri.
Eta atzo Lurrarin-rock egin zan Igorren. Lurrarinak Igorreko Gazte Asanbladak antolatzen dauan musika jaialdia da hau. Aurtengoa bigarrena izan da. Goizean umeentzako jolasak, eguerdian bazkaria karpapean, gero batukada eta kontzertuak, goizaldera arte: The Mockers, Kaotiko, Jeimon Turk Band eta Zirkinik bez arratiarrak.
Halan da be, Exaixu-k hasi eban iluntzeko rock´n´rollaren martxa, Kukumaren azken jaiean. Izan be, gure herriko taberna mitiko honek ateak zarratuko dauz 13 urte eta gero eta atzokoa izan zan “azken guda dantza”. Martxa itzela, rotuladorez hormetan idatzitako esker onezko berbak, luxuzko gonbidatuak eta sendo, sano sendo ikusten dogun taldea. Eskerrik asko danagaitik, Ainare eta konpainia!
