2008ko hauteskundeen emaitzak, Igorren

Hauteskundeak 2007-2011 orrian, 2007-ko udal hauteskundeen emoitzak, 2009-ko Europar hauteskundeenak eta azkenengo udal hauteskundeenan besterik ez dagozala ikusi dot. Alde batetik, ederto ulertzen dot zergaitia: tarte horretan izandako gainontzeko hauteskundeetan ezker abertzaleen botoak baliogabetzat hartu dira, edota abstentziorako deia egin dau aipaturiko ezker abertzaleak.

Gertatzen da, domekako hauteskundeen emaitzak   egoki aztertu ahal izateko, ezinbestekoa iruditzen jatazela, gure herriko gainontzeko eragileen emoitzak aurreko espainiar bozetan. Datuak bildu, eta zuokaz partekatzea erabaki dot; datu horreek kontuan hartu ahal izateko datorren domekako emaitzak aztertzeko orduan.

Gogoratu daigun, era berean, Ezker abertzalearen botoak baliogabetu egin ebezala 2004an eta 2008an, abstentziorako deia luzatu ebala Ezker abertzaleak.

                                           2004                 2008

PNV                                 1463                   1025

Aralar+EA                        372                       224

PSOE                               191                        312

PP                                    97                          90

Baliogabeak              %14,94 *                %1,67

Abstentzioa              %19,56                   %46,11*

Read Full Post »

PPren gainbehera, Euskal Herrian

Urte bi joan dira Gasteizko parlamenturako hauteskundeak burutu  zirenetik; orduan osatutako “parlamentutik” urten zan “lehendakari” okupak PP-ren laguntza euki dau euskal nortasunaren ezabatze prozesuan. Are gehiago, behin baino gehiagotan  entzun dautsagu Antonio Basagoiti EAE-ko  PP-ko “presidenteari”, berak agintzen dauela Gasteizko gobernuan, bera baita Lopez sostengatzen dauena.

Nahiz eta Ezker abertzalea ilegala izan, egin barri diren hauteskundeek askoz argazki errealagoa itzi deusku mapa politikoari jagokonez; PNV-ren laguntza beharko leukie PP-PSOEk BILDUri, hainbat instituziotan aurre egiteko. Agintzen ei ebanaren helburua PSOE eta PNVren artean sartzea baino ez da, eta bertatik, Euskal Herriaren desegituraketagaz eta ezabatze prozesuagaz jarraitzen saiatu.

Lantzean behin, hausnarketa positiboak entzuten doguz PSOEren aldetik, horiek, jakin badakite, normalizazio prozesua abiatzen danean, funtsezko eragilea izango direla -eta badirela- Ezker abertzalea eta bere aliatu politikoak; Basagoitiren alderdiak normalizazio hori oztopatu gura dau, gatazkan baitauka “bizitzeko” esparrua PP-k.

Zorionez, normalizazio politikoagaz beligeranteenak gainbeheran dagoz, Euskal Herrian. EAEko datuei erreparatuta -orain arte PP ez da Nafarroan aurkeztu- 2003. urtetik hona, botoak eta ordezkariak galtzen dabiz hauteskundez hauteskunde; datu hori oso pozgarria da konponbide demokratikoaren aldeko danontzat.

2003. urtean, EAEko botoen %18,7 eskuratu eban Basagoitiren alderdiak -191.250- eta 234 zinegotzi lortu ebazan; 2007. urtean botoen %15,5 -153.000- eta 185 zinegotzi; 2011. urteko hauteskundeetan botoen %13,53 -146.000- eta 164 zinegotzi. Azkenengo datu hori, gainera, sano esagurantsua da, Andaluziatik Gaztelaraino igo dan olatu peperoa ikusita. Olatu hori, baina, Euskal Herriko mugetan gelditu da.

Gerraren aldeko jarrerak ez ei dagoz “modan” gurean, eta hautesleak PPren jarrera belikosoak zigortzen dabiz.

Read Full Post »

BILDU ez da gobernatzeko gai…

Gaur, beharrerako bidean, Gasteizko lehendakari okupak esandakoa euki dot gogoan; ados nago esan dauenagaz, gainera, arazo bakarra da esaldia amaitu barik itzi dauela. Horrela litzateke Lopezen esaldia, osorik idatzita: “Bildu ez da gobernatzeko gai Espainiaren zerbitzura”; hori da ba Lopezek esan gura ebana.

Gaur ezagutu dogun datuaren arabera, %3 gutxiago emongo dau Gazteizko gobernuak euskararen garapenerako -arlo informatiko eta digitalari jagokonez-;  hori Euskal Herriaren aurkako erabakia da. Kontua da lagunok,  Lopezen alderdiak ez dauela oraindik ikasi, Euskal Herriaren zerbitzura gobernatzen.

PPSOE-k ituna eskaini dautsie jeltzaleei BILDUri gobernutik ateratzeko ahal dan toki guztietatik; azkarrak dira gero! BILDUk Euskal Herriaren aldeko apustuak egingo dauz, PPSOEk aurkakoak gure dabezan bitartean. Zelan lagundu dautsie PNVk Ajuria Eneatik bota ebenei?

Ziklo politiko barri baten sartu gara, eta azkenengo bozen arabera PNVk botoen % 30 jaso dauz EAEn, BILDUk % 25 eskuratu dauzen bitartean -bien artean, % 55-. Lopez “lehendakariaren” alderdiak %15 besterik ez dau lortu, eta horregaz dabil gobernatzen.

Has gaiten ba klabe horretan pentsetan, eta lor deiguzan ahal dan toki guztietan, Euskal Herriaren aldeko gobernuak. Euskaldunok dana dekogu irabazteko.

Read Full Post »

Berrogeialdiak, eta atentatuen “beharra”

Nahiz eta errepikatzearen ondorioz jende askok kontrakoa pentsatzen dauen, ETA erakundeak -hainbat denboran ETA (m)- ez dau inoiz Herri Batasunagaz, Euskal Herritarrogaz edota Batasunagaz inolako harreman organikorik izan; espainiako epaileek zein poliziek ez dabe behintzat inoiz holakorik probatu. Erakunde horien legez kanporatzeko arrazoiak erakunde armatuak eginiko ekintzak ez deitoratzea izan da, eta, ustez, ETAk diseinaturiko ez dakit zein estrategiari jarraitzea ez dakit zein bideetatik iritsitako “aginduen ” bitartez.

ETA banatuta egon zan denboran ETA (pm) be baegoan, eta, bere beso politikoa EIA zan; kasu horretan argi egoan harreman organikoa. Beti defendatzen eben erakunde horietako partaideek  erakunde politikoak agindu behar ebala “militarren” gainetik, eta, horrela aberastu ei zan Euskadiko Ezkerra: ETA (pm)-k burututako bahiketekaz lortutako diruagaz.

Dana dan, gutxi iraun eban peemeei ezarritako berrogeialdia, eta laister ikusi genduzan PSOE-ren barruan; ordura arteko PSE-PSOE izenaz aldatu eban -PSE-EE- bere izana mandendu arren. Gogora deikegu peemeak izan zirela politiko espainiarzaleen aurkako ekintzak burutu ebezan lehenak. Ez ziren “santuak”, ez; euren erasoak bortzitzak ziren be.

Oraingo PSOE-ko buruzagiek esaten dabiz berbak ez direla nahikoak, ekintzak behar direla Sortu legeztatzeko. Zer ekintzataz dabiz berbaz. Sortuk esan dau edozein ekintza biolentoa errefusatuko lukeela; PSOE-k, ez dela nahikoa. Zer gura dau ba PSOE-k, norbaitek ekintza bat burutzea Sortuk errefusatu deien?. Hori ezinzezkoa ei da ezker abertzalearen estrategia beteratua ei dalako. Orduan, zer da PSOE-ko buruzagiek bilatzen dabena?

Read Full Post »

Egoera politikoa

Badirudi “partidea” pareute dagoela momentu honetan. Guk bota doguz gure apostuak eta erantzuna fase diferenteetan emon deuskue. Lehenengoan, guk esandakoari “kasurik bez” zen estatuaren eta indar erregionalisten erantzuna.

Bigarrenean, mundu guztia (PP izan ezik) hasi da esaten bide onetik doala asuntoa eta konpontzeko bideak ikusten direla. Eta orain higurarrenean gagoz. Rubalcabak hartu deu kontrola eta, Urkulu lagun, desmadrea ordenetan hasi da estatuaren interesen alde. Noiz arte? Erantzunaren zati handi bat geure eskuetan dago.

Guk sinesten dogu egindako apostuak aurrera eroango gaituela Independentzia eta Sozialismoaren bidean. Eta sinesten dogu apostua aldebakarrekoa bada be, kapaz izango garela gure posizioetara geroago eta eragile gehiago ekartzeko.

Zer egin behar dogun? Argi dago, geure bidean jarraitu. Eguneroko lanean, ahal dogun momentu guztietan eta leku guztietan erakutsi behar dogu Euskal Herrian bizi garenontzako alternatibarik onena geurea dala. Ez da erreza izango; arerio gogorrak daukaguz aurrean, BAINA APOSTUAK MEREZIDU DEU !!!

Read Full Post »

Moncloako hirukotea: Zapatero, Rubalcaba eta Urkullu

Gaur, beharrerako bidean, hirukote horrek oin dala aste pare bat burutako batzarraren iguruan joan naz hausnartzen. Ordura arte Estatuaren aldeko indarrak banandu samar ibili dira Euskal Herrian zabaltzen dabilen aro berriaren aurrean; Urkulluk mugimendu “positiboak” ikusten ebazan Ezker Abertzalearen planteamenduetan, baina “nahikoak ez direla” errepikatu euskun hainbat foroetan.

Ditxososko afari horretan -Moncloan egin ebena-, irizpideak bateratu ei ebazan Estatu Espainolaren aldeko indar politiko horreek,  eta ordutik aurrera diskurtso homogeneo bategaz agertzen jakuz, bai Espainiako gobernua, baita jeltzaleen burua be. Diskurtso horren arabera gezurretan ei dabilz ETA eta Ezker Abertzalea; hartutako erabakien azken helburua udal hauteskundeetan egotea ei da eta erakunde armatuaren egitura are gehiago indartzea. Urkulluk ez dau gure Ezker Abertzalea era normalizatuan instituzioetan egotea: egoera barriaren beldur da gizona.

Ondo aztertu beharko leuke buruzagi jeltzaleak egiten dabilen bidearen ondorioa, eta ondo aztertu be nogaz dabilen tratuan. Felipe Gonzalezek -gobernu galosoaren presidenteak- aurrekoa astean El Pais egunkariari emaniko elkarrizketan egindako aitortzak sano argigarriak izan dira: erakunde armatuaren “buruzagitza” erahiltzeko zorian egon zan eta bere barne ministro Barrionuevok agindu ei eban Segundo Marey askatzea “atxilotuta” egoanean –gogora ekarri behar da gizon hori GALek bahitu egin ebala-.

Rubalcaba egungo Espainiako gobernuaren gizon indartsua  izateaz gain, Felipe Gonzalezen gobernuaren eleduna izan zan: gobernu galosoaren eleduna. Ezker Abertzaleagaz hain gogorra dan “presidente” jeltzaleak ez deko ezelango arazorik bere diskurtso eta jarrerak horrelako pertsonajeekaz bateratzeko. Gerra egiteko ituna egin dau Moncloako hirukoteak, Azoresen ospetsu egin zan hirukoteak bezala: Euskal Herria burujabearen aurkako gerra.

Read Full Post »

Argibide eske…

Gaur beharrerako bidean hanbat irrati entzuten etorri naz betiko lez. Irrati espainolek erabat iskutatzen dabe Ezker Abertzalean azkenengo hilabeteetan emandako eztabaidaren ondorioak, eta nahiago dabe azken muntai polizialaren ondorioz atxilotutakoen berri emon. Mediatikoagoa izango da eurentzat. Eta ez dezagun ahaztu GC-ren operatibo honetan atxilotu eben lehena ospitaleko larrialdi zerbitzura eroan ebela. Jakina, azkenengo kontu hau ez da hedabide gehienetan agertu.

Edozein kasutan oso argigarriak izan dira batzuk eta besteek eztabaidaren ondorioen harira esandakoak. Indar Bilgu independentista sortzea helburu dabenek, pozarren hartu dabez, azken batez haietariko batzuk sarri askotan esan dabe bide politikoa soilik erabilita burutu  ahal zala Ezker Abertzaleagaz elkarlana. Nik uzte erabat koherenteak direla aurretik  eta ondoren esandakoak. Azken aldi hontan NaBai bezalako proiektu zaharkituen alde behin eta berriz agertu dan Zabaletaren alderdiak be balorazio positiboa egin dau, nahiz eta dauela gutxi esan , Ezker Abertzaleagaz elkarlan iraunkorra ez dauela aurrera eroango. 

PP eta PSOE ez omen dabe ezer berririk ikusi, Ezker Abertzale belaunikatu eta erregionalista ikusi ez dauelako. Hauen helburua ez da pakea eta normalizazioa erdiestea, baizik eta Euskal Herria suntsitu bat ikustea. Urduritzeko modukoa egiten jakie, nonbait, ortzimugan agertzen hasi dan eskenatokia. Aitxaki barrien bila hasi beharko lukete, herri honi dagozkion eskubideak eta herritarroi dagozkigun  giza eskubideak ukatzen jarraitzeko.

Betiko lez, jokoz kanpo dagoen balorazioa, edo hobeto esanda, balorazio eza, Urkuluren alderditik etorri jaku barriro be. PPPSOE-koei behar ebezan aitxakiak emanez, hauek argibide gehiago eskatu dabez eta ETA-k burutuko ei dauen (asko dakite hauek, nonbait! ) hurrego ekintzaren aurrean Ezker abertzaleak zer esango dauen. PPPSOE-rentzako lan zikina egiten hasi dira barriro be. Kontua ez da jeltzaleentzat (jaungoikoa eta legezarra) ETA-ak ekintza armatuak ez burutzea, baizik eta balizko egoera baten Ezker abertzaleak esango lukeena. MAN-PO-RRE-RO-AK!

Eta gogora etorri jata blog honetan eta azkenengo plenoaren inguruko kronikan azaldutakoa. Orduan be, eta Andoni Akesoloren  salaketaren harira argibideak eskatu eben Igorreko zinegotzi peneuvistek… Aurpegi gogorra behar da benetan… Zelan demontre identifikatu ahal dira kaputxadun batzuk? . Jakina hau esanda ez dabe jarrerarik hartu behar. Hau da Urkuluren alderdikideen betiko martxa. Espainolei lagundu eta Abertzaleei egurra.

Egibarren aldekoek egoera aldatzen ez badabe, piperpotoa ikusiko dogu Ajuria Enean. 

Read Full Post »

EAJ-PNV versus Eusko Alkartasuna

Bi alderdi honeen jarrerak eta jardunak ipiniko dodaz gaur aurrez aurre. Alde batetik jeltzaleak dekoguz, azkenengo urteotan botere esparruak galdu besterik egin ez dabenak eta adibidez, erabat antidemokratikoak izan diren ilegalizazinoen bitartez, Ajuria Enea okupatu dabenekaz haserretu barik, euren atzetik jarraitzen dabenak ia apurren bat izten dautsien.

Gaur irrati eta egunkarietan urten dan berrian argi eta garbi azaltzen dira Lopezen alderdiagaz daukiezan hartu-emonak. Oinarrizko txosten bat be onartu ebela Urkullugaz izandako batzarrean eta antza, negoziazino une honetan, sano kaltegarria ei da dokumentua prentsara filtratu izana. Jakina, akaso hobeto, Urkulluren alderdiaren botanteak ez badira hitzartutakoaz konturatzen, ezta?

Basagoitiren alderdiak be esan dau sano ondo ikusiko leukela Urkulluren alderdia eurek eta Ajuria Eneako okupen arteko hitzarmenean sartzea. PNV-ak “nobioa kendu” gura dautso Basagoitiri baina ez dau emoten hain erraz lortuko dauenik. Berdin dautso, dana dala, buruzagitza peneuvistari, hareikaz maitemindu dira eta jo ta su ibiliko dira galdutako jabegoa berreskuratu gurean.

Eta aurrez aurre Eusko Alkartasuna dekogu. Jakin dogu Ares eta Urizar elkarrizketatu egin zireala eta Ares ezagututa, mehatxuren bat edo beste botako eutson Pello Urizarreri. Berak dana dala, abiatutako bidetik jarraituko dabela esan dau eta mehatxuak mehatxu indar-bilgune independentista bultzatzen jarraituko dabela. Argi dago Urkulluren alderdiaren filiala dan Hamaikabat osatzen dabenek Eusko Alkartasuna itzi ebenetik askoz argiago jokatzen dabilela talde politiko hau, eta zalantza barik eskertzekoa da.

Batzuk PP eta PSOE-gaz “tonteatzen” eta besteak herri honetako indar independentistak elkartu gurean. Nire desioa lehenengoak euren helburu zekenak ez lortzea litzateke eta Eusko Alkartasunari abiatu dauen bidea azkeneraino eroatea eskatuko neuskio. Seriotasunez eta konplexu barik. Zalantza barik beste hainbatek be eukiko daben irmotasun bardinagaz. Hala bedi!

Read Full Post »

Guardia Zibilaren agiriak eta Urkuluren banda

Argi dagoz PSOE-k Ezker Abertzalea suntsitzeko daroan estrategiaren nondik norakoak. Alde batetik, otsaila bitartean iraungo dauen bere ekinbide politikoa argitzeko eta zehazteko eztabaida prozesua ahalik eta gehien oztopatu eta bestetik Euskal Presoen egoera, beste barik jasangaitza bihurtzea, euren senitartekoak be umilatzen eta jazartzen.

Lehenengo eta behin, hainbat ordezkari independentista atxilotu ebezan Donostiako LAB sindikatuaren egoitzan eta eztabaida prozesuak  aurrera egin ebanez, dozenaka gazte independentista hartu, torturatu eta espetxeratu egin ebezan, eztabaida politikoa lehertzeko asmoz. Lortu, ez dabe lortu eta hainbat izan dira dagoeneko Arratia osoan gai honen inguruan egindako batzarrak.

Dana dan, behar nazkagarri honetan, PSOE-k laguntzaile fidela topatu dau Urkuluren alderdian eta txakurrak etxeko soberakinen bila doazen legez, hara doaz buruzagi peneuveroak,  PSOE-k emon ahal dautsiezan apurren bila. Honetarako baina, zintzoa eta leiala izan behar da eta horretan dabiz buru-belarri sartuta.

Urkuluren alderdia, bere hedabideen bidez dabil jo eta ke Ezker abertzalearen barne eztabaida saboteatu eta baldintzatu gurean. Hasieran Guardia Zibilak emongo eutsien txostenaren inguruko filtrazioakegiten hasi ziren, baina amaitu jakien kontu hau Ezker Abertzaleak barne eztabaidarako agiria publiko egin ebanean.

Ordutik aurrera, Grupo Noticias eta DEIA egunkari peneuveroak, beste ustezko txosten baten inguruko filtrazioak egiten hasi dira, beti ere jatorrizkoa idazkia argitara emon barik, jakina. Erraza da holan gezurtzea eta manipulatzea, honeek bai meritua… Dakiguna da Ezker Abertzaleko oinarriek txosten bakarra dabela eztabaidagai eta interneteko hainbat lekutan eskuragai dagoela. Gehiago esango nuke. Nik ez dakit Guardia Zibilak peneuveroei emondakoa ekarpena dan, oinarrizko txostenean erabilitako agirietako bat dan ala zer dan, baina ez dot kontraesan nabarmenegirik aurkitzen filtrazioa eta eztabaidagai dagoen txostenaren artean.

Eta Euskal presoen aurkako basakeria eta Ezker Abertzalearen barne eztabaidaren aurkako sabotaiak uztartuz, espainiar estatuaren makina errepresiboak, Arnaldo Otegi euskal presoaren gutun pribatu bat emoten dautse manporrero honeri eta jakina, DEIA eta gainontzeko panfleto jelkideek, argitaratu egin dabe? Ez lagunok, bestela euren gezurrak agerian geldituko lirateke. Barriro, gutunaren inguruko interpretazio eta irakurketa interesatuak egiten dabez, intimitateari, presoen eskubideei eta zibismo arau txikienari be barre eginez.

Eta ezin amaitu, DEIA-k, Borbon-aren diskurtsoa emoteagaitik zabaldu zan EITB-ren aurkako boikoterako deiaren inguruan egindako promozioa. Hori Urkuluren adeldikoek zerbait barria egin daben bakoitzean Espainiako erregea ekarri dabenean; Museoak, Euskalduna Jauregia…. Ez daukie lotsarik!

Read Full Post »

Ehpañññola izatea

Holan hasi leiteke Villacorvejo de Abajo-ko ume bateri bere Lengua Española-ko irakasleak agindu ahal deutsan idazlana. Umeak, lehenengo eta behin bere naziotasunaren inguruan hausnartu beharko leuke eta ostean bere sentimenduak idatziz azaltzen saiatu.

Kontua da, Euskal Herria, Katalunia, Galiza edota beste hamaika kasuan ez bezala, sano gatxa dala “española izatea” zer dan azaltzea, eta horregaitik, espainiarren sentimendua lau berbetan laburbildu leiteke: Erregea, Guardia Zibila, “Estankera” eta Futbol Selekzioa. Ez dago besterik, lagunok ez dago besterik.

Gaur, beharrerako bidean, erabat ilegitimoa dan Gasteizko legebiltzarrak hartutako azken erabakien inguruan etorri naz hausnartzen. Borbon erregearen gabonetako berbaldia entzun ahal izango dogu euskaldunok ETB-n,  Polizia autonomikoari ikurrina eta txapela kendu eta Espainiako polizia nazionalenantzerako biserak eroango dabez aurrerantzean eta Espainiako futbol selekzioaren partiduak euskal lurraldean, bertako moduan jokatzeko eskaria. Piperpotoaren aldeko beharra aurreratuta euki eurien Aresen gobernu okupako partaideek. Aurreratuta dinot Azkunak, Bilboko udalean,  Izaskun Bilbaok Gasteizko legebiltzarreko atarian, Durangoko alkate jeltzaleak (Jangoikoa Eta Legezarra) Durangoko udalean eta ipini eurielako, PPSOE-koei beharra kenduta.

Holan ulertu behar doguz erabaki guzti honeik. Normalizazino politikoaren kontrako ekintzak dira. Ezker Abertzalea, hain pauso garrantzitsu bezain erabakigarria emoten dabilen honetan, Aresen gobernuak, bere gerra estrategia espainolizantea arindu dau. Agian denbora amaitzen jabilkolako…

Txarrena, betiko legez, ez dira espainolen esanak eta ekintzak. Txarrenak, ustez beste aldean dauzenek esaten eta egiten dabezanak dira. Azkuna, Bilboko alkate espaniol konstituzionalistak , poz-pozik agertu da Bilbon Espainiar futbol selekzioaren partidak jokatzeko aukera zabaldu ei dalako. Hor egongo zan Azkuna ezin pozago San Mameseko palkoan Errege Borboiagaz txunda txunda entzuten, ultra-surrekoek “Ehpaññña, Ehpaññña” ohiukatzen daben bitartean… Joseba Arregi PSOE-ra joan jakien, baina nire ustez Azkunak, “Azcuna” bihurtuko dau abizena eta Don Marianoren alderdira joango jakie normalizazioan sakontzeko.

Ai, Egibar, Joseba Egibar. Zure alderdia Urkullu eta enparauen atzaparretatik kentzeko ez dozu bide errazik izango baina egiten ez badozu ez dakit zer demontre izango da zuen alderdiaz urte batzuk barru. Zorte on! Edozein kasutan eta ezin badozu hor nonbait sukaldatzen dabiltzan Euskal Herriko independentisten bilgune horretan ondo hartuko zaituenaren segurtasun osoa dekot. Bejondaizula!

Read Full Post »